Monday, May 24, 2010

ငါ တစ်ကောင်ကို မျှားကြည့်ခြင်း









ငါးမျှားချိတ် တလှုပ်လှုပ် တခါခါ ဖြစ်လာတော့
ကျွန်တော့် မကောင်းကြောင်းကို အားနဲ့ အင်နဲ့
အပေါ်ကို မရမက ဆွဲတင်လိုက်တယ်
ဒီနေရာက ကိုယ်ရည်သွေး တီးလုံးတွေ တီးတဲ့ နေရာလား
ဒီစာမျက်နှာက ကိုယ့်ဂုဏ်ကိုယ်ဖော် မသူတော်လား
အမဲရိုးကို ကိုက်ပြီးအော်တဲ့ အသံက
အဝေးကို ရောက်နိုင်မယ်လို့ ထင်လား
တိရစ္ဆာန်တောင်မှ ကိုယ့်စည်းနဲ့ ကိုယ်နေတာ သိလား
သင်တို့က လူကြီးလူကောင်းဆန်တဲ့ လူယုတ်မာလား
ဘ၀ဆိုတာ ရေပွက်ပမာ ဆိုတဲ့ စကားထဲက
ခင်ဗျားတို့ လိုချင်တာ ငွေကြေးလား ဂုဏ်လား
ပင်လယ်ကြီးလောက် ကြီးကျယ်ချင်သလား
ကောင်ကင်ကြီးလောက် ခမ်းနားကြည့်ချင်သလား
ဘဂ္ဂဒက်မှာ အခုထကွဲမယ့် ဗုံးဟာ ခင်ဗျားတို့လား
ကိုယ့်မျက်လုံးနဲ့ ငိုတာ အားမရသေးဘူးလား
အနိုင်ရလိုမှုမှာ ဂုဏ်မရှိဘူးဆိုတာကော သိလား
စိတ်ကောင်းရှိဖို့က ပထမဆိုတာ ကြားဖူးလား
ဒီတစ်ခါ တံလျှပ်ထဲ
ငါးမျှားချိတ်တံ ထပ်မပစ်ချမိဖို့တော့ လိုလိမ့်မယ်။

Sunday, May 16, 2010

.......................................

အို .. အမိငဲ့
နင်ဟာ ငါ့ အာရုံအလင်းကို ညှိထွန်းသူ
ငါ့ ကန္တာရအပူကို မျှယူငြှိမ်းသတ်လို့
ငါ့ အိပ်မက်တွေကို ပင်လယ်ဆီဆောင်ကျဉ်းတဲ့
တစ်စင်းတည်းသောမြစ်...။

အို .. အမိငဲ့
ထာဝရသစ်လွင်သော မြတ်နိုးခြင်းတရားမှာ
အရာရာတိုင်းကို တို့အတူ ပျိုးစိုက်ခဲ့
မိုး မလိုက်ရင်လည်း နေပါစေကွယ်
ဒီအချစ်တွေနဲ့ပဲ
တောလုံးညွတ်အောင် စိမ်းလန်းကြမယ်...။

အို .. အမိငဲ့
ဘုရားသခင် ဆိုသူရယ်
တားမြစ်ထားသော သစ်သီးရယ်နဲ့
မြွေတစ်ကောင်ရယ်.. နင် ရယ်
ကမ္ဘာဦးကတည်းက
မျိုးနဲ့ရိုးနဲ့ မျက်စိသူငယ် နားသူငယ် ငါ ရယ်
အဲဒီဥယျာဉ်တော်ထဲမှာပေါ့...။

ငါ့ နံရိုးလေးဖြစ်လို့
ငါ့ အရေပြားဖြတ် အသားဖြတ်
ငါ့ အသွေးနဲ့ အကြောမွှာတွေကိုဖြတ်
အရိုးထိ ဆတ်ဆတ်တုန်အောင် နှင်းအပ်ခဲ့ရပြီးသောနောက်...
ငါ့အား ဖန်ဆင်းသူကို ဆန့်ကျင်လို့
အဆိပ်သီးဆိုတာကို ၀ံ့ဝံ့ရဲရဲ ဆွတ်ယူစားသုံးလို့
ရွံရှာဖွယ် သွေးဆောင်ဖျားယောင်းခြင်းကို လက်ခံသိမ်းဆည်းလို့
နင့် နှုတ်ခမ်းလေး အတိမ်းအဖွဲ့လောက်မှာပဲ
ယိမ်းကာ နွဲ့ကာ ကခုန်ရဲခဲ့သောနောက်...

အို .. အမိငဲ့
နင့် လိုအင်လေးအတွက်နဲ့
ထာဝရအသက်ကို ငါ စွန့်လွှတ်ခဲ့ရ
မစင်ကြယ်ခြင်းဆီ ငါ ခုန်ဆင်းခဲ့ရ
မြေကြီးသို့ ကျိန်စာမှာ ငါ နာပျော်တတ်ခဲ့ရ
ငါ့သား ငါ့မြေး ငါ့သွေး ငါ့ အသက်
ငါ့ အဆက်ဆက်ကို ကျွန်ဇာတ်သွင်းခဲ့ရ
ငါတို့ရဲ့ ဧဒင်က စခဲ့တယ် အမိငယ်...။

အို .. အမ်ိငဲ့
ကောင်းကင် မြေကြီး ဟင်းလင်းပွင့်တော့မှ
ကိုယ့်အနူးညံ့ဆုံးဆီ ကိုယ်တိုင်ထိုးစိုက်ခဲ့မိသော
ကျမ်းစာလာ သံငုတ်ဟာ ပြုတ်မတဲ့
ငါ့သံငုတ်ကိုတော့ နင်ပဲ ဖြုတ်နိုင်မယ် အမိငယ်..
ငါ့ စီရင်ခြင်းနေ့မှာတော့
ငါ့ ရှေ့က ကျောက်သားပလ္လင်ပေါ်မှာ နင့်ကိုပဲ တွေ့ချင်ရဲ့အမိငယ်...။

အို .. အမိငဲ့
နင်သဲ့ယူပြီးစီးသော ငါ့ဘ၀အလုံးမှာ
ငါ့ရှုံးနိမ့်ခြင်းတွေက တိမ်ပုခက်တွေလို အရောင်တလက်လက်စုံလင်ပြီး
နောက်ဆုံးစားပွဲက စပျစ်ရည်ထက်ကို ပိုမိုချိုမြိန်လိမ့်မယ်
ဒီလိုပဲ ငါယုံကြည်ရဲခဲ့ပါရဲ့...။

အို .. အမိငဲ့
အဆုံးအစမဲ့ အထက်အဇဋာမှာ
ငါဟာ ချစ်ခြင်းတရားကို ကြယ်တွေလို ချိတ်ဆွဲထားရဲ့
နင့် လိုဘပြည့်အောင် ခူးဆွတ်လှည့်ပါကွဲ့။
ဘ၀ ဟာ ကြိုးတစ်ချောင်းဆိုခဲ့ရင်လည်း
နင့်ကြိုးတစ်စကို ငါ့ ကြိုးတစ်စနဲ့ ယှက်ငင်တော့
သုံးလွန်းတင်တဲ့ သံယောဇဉ်
သံသရာပြင်ထိအောင်သာ ချည်နှောင်ပါတော့ အမိငယ်...။

အို .. အမိငဲ့
ငါ့အတွက်မတော့ အချစ်ဆိုတာ
ဘယ်သမုဒ္ဒရာမှာမှ မနစ်မြုပ်နိုင်သော
နျူကလီးယားစွမ်းအင်သုံး အခိုင်ခံ့ဆုံးလှေသင်္ဘောဖြစ်တယ်
ငါ ယုံကြည်အပ်သောအရာတိုင်းကို ယုံကြည်တတ်ဖို့အတွက်
ငါ့ ယုံကြည်ချက်တွေကို အသက်သွင်းပေးသော အရာဖြစ်တယ်
ငါ့ တည်ရှိခြင်းကို အသိအမှတ်ပြုပေးတဲ့
ပန်းနုရောင် မွေးစာရင်းစာရွက်လေးလည်း ဖြစ်တယ်
ငါ သောက်ချိုးလိုက်တိုင်း ပျိုမြစ်ခြင်းကို ပေးတဲ့
ပြာလဲ့လဲ့ နတ်ရေကန်တစ်စင်းလည်း ဖြစ်ပါတယ်...။

အို .. အမိငဲ့
တည်ပြီးခဲ့လေသော ပန္နက်
လောင်းချပြီးခဲ့လေသော ရေစက်
ဘယ်လိုအခြေအနေဖျက်ဖျက် သွေမပျက်ဘူး။
လေလှိုင်းထဲက
နင့် အသံလေး ကြားရုံနဲ့ ရူးတတ်ဖို့
ငါ့ရင်ဘတ်ကို ငါ တူးဖော်ယက်ဆွခဲ့
နင်သိရဲ့လား..
အဲဒါက တအားနာတယ်...။

အို ..အမိငဲ့
နာကျင်ခြင်းတွေနဲ့ ယမန်နေ့ကို
လိုလိုချင်ချင် လွမ်းတတ်နေတုန်းမှာ
နာကျည်းခြင်းများနဲ့ ဒီကနေ့က ဆိုက်ဆိုမြိုက်မြိုက်ရောက်ရှိလာ
မနက်ဖြန်မှာရော ငါ့ အနာ တွေက
အဖေးအသားတက် ကျက်လေမလား..?
နင့် နှုတ်ခမ်းပါးလေးနဲ့ပဲ ငါ့အသက်ကိုချိတ်ဆက်ထား
နင် ထားမသွားခင် ငါအရင်သေနိုင်တယ် ဆိုတာ နင် သိရဲ့လား..?
အား!!!!!! နာလိုက်တာဟာ...။

အို .. အမိငဲ့
နင့် ယဲ့ယဲ့လေး အပြုံးမှာ
ငါ့ ရင်ဘတ်က ပန်းတွေ တအုံးအုံးကြွေတတ်တာ
ဒါ ငါတွေ့ရှိသော ဆွဲငင်ခြင်းနိယာမအသစ်ပဲ..
ငါ့ ပတ်လမ်းတိုင်းရဲ့ တစ်ခုတည်းသော ဗဟိုချက်ဟာ နင်ပဲ..
ငါ့ကို စုပ်ယူမယ့် တွင်းနက် လှတပတလေးဟာလည်း
နင့် မျက်ဝန်းနက်ကလေးပဲ...
ကဲ...
သိမ်းလှည့်ဆည်းလှည့်
ဟောဒီကလေကချေ ဘ၀အလုံးဟာ
နင့် ခြေရင်းတည့်တည့်မှာ
သံသရာထိ ရုံးအားမဲ့နေပြီပဲ အမိငယ်ရယ်...။ ။




မိုးကေခမ်းကို ကျွန်တော်နဲ့ ပတ်သက်ပြီး ကဗျာစပ်ပေးပါဆိုတော့ သူစပ်ပေးလိုက်တဲ့ ကဗျာပါ။

Saturday, May 1, 2010

မိုးမြေမဆုံး လွမ်း

မှားယွင်းနေတဲ့ နေ့နာရီဟာ
သောက်နေကျ ပုံမှန်ဆိမ့်ဆိမ့်တစ်ခွက်
ဘယ်ပညာနဲ့ ထွင်းထု အဆုံးသတ်သတ်
ဟောဒီ ပန်းပုရုပ်ဟာ တဖြည်းဖြည်းဘီလူး
ဘဏ်ကို ဓားပြတိုက်ရင် ထောင်ဒဏ်
ဘ၀ကို ဓားပြတိုက်ရင် တံတွေးခွက်ဒဏ်
စူးခနဲ ပိုပိုအောင့်လာတဲ့ နှလုံးကို
ဘယ်နတ်ဒေ၀ါလက်နဲ့မှ ဖုံးအုပ်ကုသလို့မရ
ချက်ချင်းဆိုသလို မျက်မှောင်မိုးသည်းကြား
မျက်မုန်းကျိုး မိုးမုန်တိုင်းတိုက်ခတ်မလား
နံရံကို ထိုးလို့နာတဲ့ လက်သီးနဲ့
ဘ၀ကို ချောက်ထဲ တွန်းချပေးနိုင်မလား
မပြီးဆုံးသေးတဲ့ နေ့ရက်ကနေ
တကယ်ချစ်ရဲ့လား မေးခွန်းမှာ ခွေခေါက်လဲကျ
အားလုံးကို ငိုပြဖို့ ရယ်ပြဖို့ နေပြဖို့ဆို
ကိုယ်က အိုးမဲ့ အိမ်မဲ့ နေထိုင်ဖို့မဲ့ ဗလာ
ပင်လယ်ပြင်မှာ ကိုယ့်ခဏခဏ သင်္ဘောမှောက်တယ်
အရမ်းချစ်တယ် ဆိုတဲ့ ကောက်ရိုးတစ်မျှင်သာ မရှိရင်
ကိုယ်ဟာ တိုက်ပိတ်ခံထားရတဲ့ အကျဉ်းသား။