ပုလင်းတူဗူးဆို့ချင်းချင်းကနေ
ငါ့ပုလင်းက အာမီရမ်အပြင်းစားကွလို့
စက်ရုံတစ်ခုထဲကနေ တံဆိပ်နှစ်ခုနဲ့ ခုန်ထွက်လာပြီး
ညည်းချင်းထပေးရသပေါ့
သည်လိုလည်း ရှိသေးသဟ
သည်လိုလေးလည်း ရှိပြန်သဟ
မှတ်ရ ကျက်ရ ပြန်ဆွေးနွေးရ
သမိုင်းစာအုပ်ထဲ ဘယ်အပိုဒ်ကို မကြိုက်မိသလဲ
အဲဒီအပိုင်းက သင့်ဘဝပဲ
အမှားကို အမှန်ခြစ်ပေးရပြန်တယ်
အချိန်ခရီးသာ သွားနိုင်ခဲ့မယ်ဆိုရင်တဲ့
မွေးကင်းစဟစ်တလာ သတ်မလား
လူသားတစ်ယောက်ဆိုပြီးတော့ ကယ်တင်ခဲ့မလား
သေသင့်သူတွေ သေရမယ်ဆိုပြီး လွတ်ထားမလား
သင့်မျိုးနွယ်တစ်ခုလုံး မတုန်းသွားဘူးဆိုရင်ပေါ့
ငါသာဆို ဟစ်တလာကို အားပေးခဲ့မယ်
တကယ်ဆို
ငါလည်း ဟစ်တလာလို မွေးဖွားလာသင့်ခဲ့တာ မဟုတ်လား
အားလုံးက ဟစ်တလာဖြစ်နေကြတာပဲ
ငါ
စိတ်နဲ့လည်း မျိုးတုန်းအောင် အသတ်ခံရတယ်
အပြောနဲ့လည်း မျိုးတုန်းအောင် အသတ်ခံရတယ်
အလုပ်တွေနဲ့လည်း မျိုးတုန်းအောင် အသတ်ခံရတယ်
ဟစ်တလာတွေနဲ့ ရင်ဆိုင်နေရမယ့်အတူတူ
ဟစ်တလာဖြစ်တာပဲ ကောင်းမယ်။
