Monday, August 23, 2010

ငါးရိုးစူးတဲ့ ငါး

အခု ငါကြားနေတဲ့ သီချင်းက
အခု ငါနားထောင်နေတဲ့ သီချင်း မဟုတ်ဘူး
အခု ငါမြင်နေတဲ့ မြင်ကွင်းက
အခု ငါကြည့်နေတဲ့ မြင်ကွင်း မဟုတ်ဘူး
လူသူပြတ်တဲ့ ငါ့ရင်ခွင်မှာ
သူပဲ အမြဲနေထိုင် သွားလာနေခဲ့တယ်
ပြောသံဆိုသံ တိတ်နေတဲ့ ရင်ခွင်မှာ
သူ့အသံပဲ အမြဲ ချိုလွင်နေခဲ့တယ်
ကြည့်မိတဲ့ အရာအားလုံးထက်မှာ
သူ့အပြုံးပဲ အမြဲ ငုံယူထားတယ်
တွယ်တာမိတဲ့ သံဆူးကြိုးတွေ
အနီရောင် မျဉ်းအောက်မှာ
ပြတ်တောက်သွားဖို့ ဝန်လေးတုန်း
အမြဲတမ်း ဆက်ဆက်ရှုံးနေခဲ့ပေမယ့်
အညွန့်ချိုးလိုက်မှ သစ္စာပန်း အကုန်ပွင့်သတဲ့။

Thursday, August 19, 2010

“သားကောင်”

ကိုယ့်ကိုကိုယ် မှန်ထဲပြန်ကြည့်ဖူးလား
မှန်ထဲကနေ ကိုယ်ကို ပြောတဲ့အသံ
ပြန်နားထောင်ဝံ့လား
မှန်ကို ကြည့်တော့မယ်ဆိုရင်
မှန်ရဲ့ အထူအပါးကို သိဖို့လိုတယ်
နောက်ခံပြဒါး ကောင်းမကောင်း သိဖို့လိုတယ်
မှန်မှာ အစွန်းအထင်း ရှိမရှိ အရင်ကြည့်ဖို့လိုတယ်
မှန်ရဲ့ သတ္ထုက စင်စင်ကြယ်ကြယ်ရှိဖို့လိုတယ်
မှန်ရဲ့ လှည့်စားမှုနဲ့ ကိုယ့်ကိုကိုယ် မနစ်စေနဲ့
လောကမှာ မှန်တွေ ပေါပါတယ်
ပြတင်းမှန် ဗီဒိုမှန် ဆိုင်ခန်းမှန်
တံခါးမှန် ကားမှန် အလှဆင်ထားတဲ့မှန်
ရှေ့ကြည့်မှန် နောက်ကြည့်မှန်
ကြည့်လို့ ကောင်းတဲ့မှန်
ကြည့်လို့ မကောင်းတဲ့မှန်
စိန်သွားနဲ့ အဖြတ်ခံနေရတဲ့မှန်
ဘာနဲ့မှ ဖြတ်တောက်လို့မရတဲ့မှန်
ဘယ်မှန်မှာ သင့်ကိုသင် ပြန်ကြည့်မိလဲ
မှန်ကို အမှန်အတိုင်း မကြည့်ရင်
သင် ....
တက်တက်စင်အောင်ကို “မှား”။

Wednesday, August 18, 2010

ပန်းသည်

ပန်းချီ.heavenghost


















“ဟောဒီမှာ ပန်းတွေရမယ်”
“စံပယ်ပန်း၊ မြတ်လေးပန်း၊ နှင်းဆီပန်း”
ပန်းသည်မိန်းမကြီး ပန်းတွေ ရောင်းနေတယ်
တစ်လမ်းဝင် တစ်လမ်းထွက်
မနက်လေးနာရီကနေ ကိုးနာရီအထိ
ညနေကျတော့ သုံးနာရီကနေ မှောင်တဲ့အထိ
သူရောင်းနေတဲ့ပုံကို ကြည့်လိုက်မိရင်
စံပယ်လည်း မဖွေး၊ မြတ်လေးလည်းမလှ
နှင်းဆီလည်း ပုံပန်းမကျနိုင်တော့
အဲဒီထက် သူ့ဘဝအကြောင်းသိရင်
မချိလောက်အောင် ပန်းသည်ဘဝ ပန်းနေပုံ
“ပန်း”လို့ တစ်ခွန်းပါတိုင်း ဘဝထဲကို
မောပန်းမှု ပင်ပန်းမှုတွေ တစ်ပွင့်စီ
ခြွေချခံနေရသလား မှတ်ရတယ်
ဝယ်သွားတဲ့ ပန်းတွေ ဘုရားတင်သလား
ဆံနွယ်လှလှမှာ နေရာကျကျနဲ့လား
သူကတော့ ယောကျာ်းအတွက် အရက်ဖိုးရပြီ
ဒီနေ့ တစ်နေ့စာ စားဖို့ ဆန်ဖိုးရပြီ
ကျောင်းတက်နေတဲ့ သားသမီးအတွက်
ကျောင်းစရိတ်ရပြီဆိုပြီ အတွေးကို စီခြယ်လို့
ငိုဖို့ ရယ်ဖို့မေ့နေတဲ့ မျက်လုံးမှာ
ကျီးကန်းတောင်မှောက်မျက်လုံးကို အစားထိုးလို့
ငါ့အသက် ကယ်ပါလို့ ဖွင့်ဆိုနေတဲ့
ပြာလုလုအသံနဲ့ အမြဲယောင်ရမ်းနေပုံက
“ဟောဒီမှာ ပန်းတွေရမယ်
စံပယ်ပန်း မြတ်လေးပန်း နှင်းဆီပန်း”တဲ့
လူက ပန်းတိုင်မရှိတဲ့ လမ်းတွေ ဝင်လို့။

သရုပ်ဖော်ပန်းချီကို လဂွန်းအိမ် မှ လက်ဆောင်ပေးပါသည်

Saturday, August 14, 2010

ကြည့်မှန်တစ်ချပ် ကောက်ရခြင်း

မည်သည့်အရာကိုမျှ မသိမ်းပိုက်လိုသော တဲ့
မင်းမြတ်သူရ ဝတ္ထုရဲ့ အဆုံးသတ်စာ
ဖတ်ရ ပြုရတာ လွယ်သလောက်
ဟောဒီ ဥမ္မတကောအတွက်
ဘယ်လိုရူးသွပ်ရန်အကြောင်းများနဲ့
ဘယ်အရွေ့မှာ ဘယ်အချက်တွေက
ငါ့ကို အစိတ်စိတ်အမွှာမွှာ သတ်ဖြတ်ဦးမလဲ
ငါ့ကိုယ်ထဲမှာ ငါမရှိတော့လည်း
ငါ့အပြစ်တွေက ငါ့ကိုရှာပြီး
ငါ့ဆီ တန်းတန်းမတ်မတ်လာ
ငါ့အပြစ်တွေနဲ့ ငါ့ကိုထားရစ်လို့မရအောင်
ငါ့ကို ခိုင်ခိုင်မာမာထုဆစ်
စကားလုံးများအောက်မှာ ငါနစ်မြုပ်ပြီပဲ
ငါ ကျစ်ကျစ်ပါအောင် ဆုတ်ကိုင်ထားတဲ့ကြိုးတွေ
အဆိပ်ပြင်းမြွေအဖြစ် ငါ့ကိုရစ်ပတ်
အနံ့အရသာမဲ့စွာ ဇာတ်ဝင်ခန်းရပ်ပြီ
ကဲ ငါသွားရတော့မယ်
လူတိုင်းရဲ့မြင့်မြတ်တဲ့ နှလုံးသားရင်ပြင်တော်မှာ
ရွံ့ညွှန်အထပ်ထပ် ငါ့သိက္ခာကို ထားခဲ့ပြီး
ငါ သွားတော့မယ်။

Thursday, August 12, 2010

အလမ္ပါယ်

ရွှီ.. !!!

ပုလွေသံက
မိတ် ရှာနေတဲ့ မြွေတစ်ကောင်ရဲ့ တွန်သံလို
စူးစူးရှရှနိုင်လွန်း....။

ညှို့တတ်တဲ့ မြွေတစ်ကောင်ကို
နောက်ထပ် မြွေတစ်ကောင်က ထပ် ညှို့....။

ပါးပျဉ်းခွက်လေးကို
ယို့ယို့ပြီး နွဲ့နွဲ့ယိမ်း....... တိမ်း...။

ပုလွေနဲ့ မြွေ
ဘယ်သင်းက ဘယ်သင်းကို ထိမ်းကျောင်းသလဲ..?

မေးလို့ မြန်းလို့မှ မဆုံးသေး
“ ဟေ့လူ ! ခင်ဗျားမျက်နှာမှာ အကြေးခွံတွေ..”
“ ဟုတ်လား.. ဒါနဲ့ ခင်ဗျားမျက်ဆန်ကရော ဘာကြောင့် နီစွေးနေ..?။

အမြီး တိုတို .. ရှည် ရှည်
မြွေဟာ မြွေပဲ...။

ပုလွေသံကတော့
မြွေတစ်ကောင်လိုပဲ အလျားလိုက် တွန့်ငင်ပြီး
အာရုံဆီကို တရွတ်တိုက် ပွတ်....သပ်.......ဝင်
မနှစ်မြို့စရာပေမယ့်
ဘယ်မြွေမှာမှ တံခါးရွက်နဲ့ သော့ခလောက် မရှိကြဘူး....။

ဒါ...
မြွေတစ်ကောင်ကို
နောက်ထပ်မြွေတစ်ကောင်က ရွံရှာဖွယ် ညှို့တာပဲ
ပြီးတော့...
အထွေးလိုက် အထွေးလိုက် ညှို့ချက်မှာ ရစ်ပတ်ကြ
ရမ္မက်ကြောတွေ ဆွဲဆန့် လိမ်ခေါက် ကျုံ့ဝင်ကြ
ကျောရိုးရှည်တွေ ပို..ပိုပြီး
ရှည်မျောထွက်လာအောင် တောခွေးအ လိုမျိုး အူတွန်ကြ.../

အမြီး တိုတို.. ရှည်ရှည်
မြွေဟာ မြွေပဲ..
မြွေလို နေထိုင်ရင်လည်း မြွေပဲ....။

ရွှီ.. !!!

မိုးကေခမ်း

Tuesday, August 10, 2010

အဆိပ်သင့်နေတဲ့ကဗျာ

ဘာမှမဟုတ်ဘူး...
အကြည့်လေးတစ်ချက်ပဲ အလွဲလွဲအချော်ချော်ဖြစ်နေကြတာ
ပြီးတော့လည်းပြီးသွားမှာတွေပဲ
ခဏလေးပွင့်ခွင့်ရနေတာကိုများ
သူက လှတယ်, ငါက လှတယ်နဲ့ နားရှက်စရာ
သူများကို လက်ညှိုးမထိုးခင် ကိုယ့်ကိုယ်ကို အရင်စစ်ဆေးဦး
ခင်ဗျားတို့က အပေါ်ယံအရေပြားလောက်နဲ့ပဲ ဘ၀ကိုအဆုံးသတ်မှာလား
အဲဒီငါးခုံးမတွေကြောင့်ပဲ တစ်လှေလုံးပုပ်ပုပ်နေရတာ
ဘာဖြစ်လို့လဲ...
စင်အောက်ကိုရောက်နေလို့သိမ်ငယ်နေတာလား
မနာလိုစိတ်လောက်ရွံစရာကောင်းတာ ဘာမှမရှိဘူး
လာပါ...
မျက်နှာချင်းဆိုင်ပါ...
ရဲရဲပြောပါ...
ခင်ဗျားနောက်ကျောမှာဝှက်ထားတဲ့ဓားက
ခင်ဗျားနောက်ကျောကိုစိုက်ဝင်နေတာ ကြည့်မကောင်းဘူး
အားလုံး``ပုထုဇ္ဇနော ဥမ္မတ္တကော´´တွေချည်းပဲ
ကိုယ့်ကို လက်ခုပ်တီးပေးနေတာကြိုက်သလောက်
သူများကို လက်ခုပ်တီးပေးရမှာပျင်းတဲ့လူ
ဒီလောက်ပဲလား...
ခင်ဗျားရဲ့ရှင်သန်နေထိုင်မှုက ဒီလောက်တင်ပဲလား
လူဖြစ်ခွင့်ခဏရတုန်းလေး
လူလိုသူလိုအသက်ရှူသွားပါဦး
ဟိတ်... ဒီမယ်...!!!
မြွေပွေးတိုင်းအဆိပ်ရှိတဲ့အကြောင်း...
ဘယ်ကျမ်းဂန်မှသွားဖတ်နေစရာမလိုဘူး
အသက်လှလှရှူပါ...
အိပ်ရေးလှလှအိပ်ပါ...
မနာလိုစိတ်ကို ခပ်ထုတ်နိုင်သလောက်ခပ်ထုတ်ပစ်ပါ
ပန်းပွင့်တိုင်းမမွှေးတဲ့အကြောင်း
ခင်ဗျားနဲ့တွေ့မှပိုသေချာသွားတယ်
စကားများများပြောချင်ရင် စာပြန်သင်လိုက်ဦး
ကိုယ့်ကိုယ်ကို အရင်ဂရုစိုက်
အကြည့်ကို ဖြောင့်ဖြောင့်တန်းတန်းထား
နင်းထားတဲ့မြေကြီးဟာ အားလုံးနဲ့သက်ဆိုင်တယ်။


ထွန်းလင်းသစ်(ကန့်ဘလူ)

Monday, August 9, 2010

စာမျက်နှာ (၁၃)

ပြင်ပက ရာသီဥတုကို သူ့ကိုယ်ထဲဆွဲထည့်
ညဉ်းငွေ့မှုက လူတွေရဲ့ စိတ်ကို သူ့ကိုယ်ထဲဆွဲထည့်
တောက်လောက်မှုက ဒေါသကို သူ့ကိုယ်ထဲဆွဲထည့်
အမှိုက်ပုံက ဖြူစင်တဲ့ နှလုံးသားကို သူ့ကိုယ်ထဲဆွဲထည့်
ညစ်ညမ်းမှုက လေထုကို သူ့ကိုယ်ထဲဆွဲထည့်
မကောင်းသတင်းက ငါ့ကို သူ့ကိုယ်ထဲဆွဲထည့်
အစာမကြေ ရင်ပြည့်ရင်ကယ်မှုတွေက
အသိဉာဏ်မဲ့နှုတ်ခမ်းတွေကို သူ့ကိုယ်ထဲဆွဲထည့်
ဒီလိုနဲ့ သေမင်းဟာ ငါ့ခြံစည်းရိုးကို ကျော်ဝင်လာခဲ့
ပျက်အစဉ် ပြင်ခဏထဲမှာ
နာမည်ပျက်တာ မပါလောက်ဘူး
မျက်စိထဲ စူးနေတဲ့ ပါးမွေးကို
ဘာနဲ့မှလည်း နှုတ်လို့မရဘူး
နားလည်မှုအပြည့်နဲ့ အမြဲခွင့်လွတ်နေမယ့် ငါ့ကို
ချစ်သူက နားလည်ခွင့်လွတ်တော့မှာ မဟုတ်ဘူး
အမြဲရှုံးနေတဲ့ ငါ့အတွက် အရှုံးထဲက ထပ်ရှုံးရာမှာ
အခုရှုံးတာလောက် ထပ်ရှုံးစရာလည်း မရှိတော့ဘူး

Friday, August 6, 2010

ကျားသားမိုးကြိုးကိစ္စ

ကျားသားမိုးကြိုး ဒီခေါင်းစီးနဲ့ကဗျာကို
ဘယ်သူရေးတာပါလိမ့် ပိုင်စိုးဝေ၊ စိုင်းဝင်းမြင့်
ဟင့်အင်းကျားသားမိုးကြိုးပဲ မမှတ်မိဘူး
မပြတ်သားဘူး၊ မဆုံးဖြတ်ဘူး၊ မသုံးသပ်ဘူး
ဒါပေမယ့် ဒါက ကျားသားမိုးကြိုးကိစ္စ
တချို့နယ်ကတော့ ကိစ္စဆိုရင် လူသေတာပဲ
သေလို့ သေတဲ့လူက မြေကြီးဖြစ်တာပေါ့
ရှင်ကျန်တဲ့သူ ရွှေထီးမဆောင်းတာတော့
ဆောင်းတွင်း မဟုတ်လို့ ဖြစ်ချင်ဖြစ်မှာပေါ့
ဒါက ကျားသားမိုးကြိုးကိစ္စပဲ
ကျားသားမိုးကြိုးက ဒါမျိုးသိချင်မှ သိမယ်
မသိမှုနယ်မှာ သိမှုသိပ်မကြွယ်တော့
ငါ့အရိပ်မှာ မနေရင် ငါ့အဆိပ်နဲ့ သေစေချင်တယ်
ဒိတ်အောက်ရင် အမောဖောက်တဲ့စကားနဲ့
လက်ညိုးငေါက်ငေါက်ထိုးချင်တယ်
၂၀၁၂ မှာ တကယ် ကမ္ဘာပျက်မှာလား
ငါ စော်ကားမော်ကားလုပ်ထားတာ ငါးခု ရှိတယ်
နှစ်ခုပဲ ခုထိ ငါ့ဆီပြန်ရောက်သေးတယ်
ကျန်တဲ့သုံးခုတော့ တုံးခုသင့်ရင် ခုရမယ်
ဖြစ်သူအဟောင်း ငါ့အတွက် ငါဝမ်းသာပေမယ့်
ပြုသူအသစ်ဖြစ်တဲ့ ဓားစာခံတချို့အတွက်
ယဇ်ပူဇော်ပွဲထဲက ဘုရားလောင်းဆိတ်လို ငိုမိတယ်
အင်္ဂလိပ်ဗေဒင်အရ ၃၇ ဂဏန်းကျပြီး
မြန်မာဗေဒင်အရ ထွန်းကြွယ်အဆုံးမှာကျတဲ့နှစ်
ဒီလောက်ပဲဖြစ်တာ ကံကောင်းတယ်
ဆုတောင်းမိတာ တစ်ခုရှိတယ်
ကျန်တဲ့သုံးခုလည်း ၀ဋ်အဖြစ်သာ လာခဲ့ပါလို့
၂၀၁၁ သြဂုတ် ၃၁ ရက်နောက်ဆုံးထားပြီး
ဝဋ်အဖြစ်လာခဲ့ကြပါ၊ မြန်မြန်သာလာပါ
ဒါဟာ တကယ့်ကျားသားမိုးကြိုး။