အေးအေးလူလူကျန်ခဲ့သူနဲ့အေးအေးမြမြထွက်သွားသူ

Friday, January 18, 2019
အေးအေးလူလူကျန်ခဲ့သူနဲ့အေးအေးမြမြထွက်သွားသူ

ငါလျှောက်ရတဲ့ လမ်းတွေက ရှည်လိုက်တာ
ငါ လက်ထပ်လိုက်ပြီ
ဒီစကားမှာ ငါလျှောက်ရတဲ့ လမ်းတွေ ပိုရှည်သွားတာ
မင်းလွတ်မြောက်ပါစေ
မင်း အေးမြစွာ ပျော်ရွှင်စွာ တသောသောရယ်မောနိုင်ပါစေ
ဘယ်အနှောင့်အယှက်မှ မရှိပါစေနဲ့
အဆိပ်ဖြစ်ဖြစ် သောက်ရင်း
ဆွဲကြိုးချဖို့ ကြိုးတစ်ချောင်းလောက်ဖြစ်ဖြစ် ကျစ်ရင်း
ငါ နေခဲ့ပါ့မယ်
မပြတ်မသား ဆုံးဖြတ်မိခဲ့တာတွေ
မချေမငံ ပြန်ပြောမိတာတွေ
ဂရုတစိုက် မရှိခဲ့တာတွေကို
အသံမပါတဲ့ရုပ်ရှင်ကြည့်သလို ဆွံ့ဆွံ့အအပြန်ကြည့်ရင်း
ငါနေခဲ့ပါ့မယ်
ခြေပြတ် လက်ပြတ်ဖြစ်သွားသူတွေ
ကားအက်ဆီးဒင့်ထဲ ပါသွားသူတွေ
ချောက်ထဲ အတွန်းချခံရသူတွေ
ပြီးတော့
ဒဏ်ရာရတဲ့ စစ်သားတွေ သူတို့ဘယ်လိုနာကျင်ကြလဲ
ကျည်ဆန်တွေ အပြည့်ထည့်ထားတဲ့ သေနတ်ရဲ့
ခလုတ်ကို မင်းအလွယ်တကူပဲ ဆွဲလိုက်တယ်
ငါ့ရင်ဘတ် ပေါက်ထွက်သွားတာကိုပဲ
ယုံရမလို မယုံရမလိုလို ခဏခဏ ဖွင့်ကြည့်ရင်း
ငါ အေးအေးလူလူနေခဲ့ပါ့မယ်။
ဖြစ်ပြီးသွားတာတွေကို မှန်တယ်လို့ပဲ ယူပါ
အဲဒီအမှန်ကိုလည်း မှားတယ်လို့ မတွေးမိပါစေနဲ့
လူတိုင်းသိ လူတိုင်းပြောကြတဲ့ စကားတစ်ခွန်းရှိတယ်
အချိန်က ကုစားပေးလိမ့်မယ်တဲ့
အဲဒီစကားကိုလည်း နင်ယုံကြည်လိုက်ပါ
ဇနီးကောင်းတယောက်ဖြစ်ဖို့ ကြိုးစားပါ
ငါ့အတွက်ကိုတော့
အသည်းကွဲတာကို အနိုင်ယူနိုင်တဲ့ သူရဲကောင်းဆိုတာ
မရှိကောင်းလို့ မရှိဘူးလို့ပဲ မှတ်လိုက်ပါ။
Powered by Blogger.